2Jo | DOB | STEP |

YONI 'INA 'ETOLADI 'ELUWENA Yoni 'ina leta gete solanaya 'iemwasala oboboma be e'ita palupaluna manudi.

2 John

Lokagutoki

1 'Abo'agu 'imi 'ena'i, ta 'oyo waine Yaubada 'iesinuwemu manatumwao 'emiya leta gete ya'etoladinawa. Ona'ai'aila, yaobobomemi sinabwana. Nadigega wate taudi 'eda 'ai'aila 'ana tomuliyao siobobomemi, 2 manuna mwalatoi 'ai'aila 'atedaya 'imiyami be 'edaya 'ida miyaataya. 3 'Enega Tamada Yaubada be Natunana Yesu Keliso 'idi oboboma be 'idi 'atenuwa'ole'ole 'ediyega tada miya siwalowa, ma ida ona 'ai'aila, be wate ma ida eobooboboma.

Keliso tetelina wagiyai'i'isi

4 Lowa 'aidi natumwao ya'itedi 'eda palupaluna simulimuliye, nadigega 'ada loina Tamada 'enega, 'enega yagwausowala sinabwana.

5 Nuugu ye, yasideyo wate gete nigeya 'aene loina auwauna ya'ebwa'ebwa'eyo, ta esi loina kadekadelina nina wagimi nononaya 'aene maibo'ada tada eobooboboma. 6 Manuna 'eguma taeobooboboma, nate Yaubada 'ina loinao tamulimuliyedi, ta loina nina lowa wanononaya 'aene oboboma 'ina 'eda 'enega tada tauya.

7 Ta tokabo yaudi ni'atu siapwesa bale'uya ga sieyaseyase, sigwae, “Yesu Keliso nigeya 'ieetomota.” 'Eguma yaita nadigega 'ikabo'esa, tauna Keliso 'ana talauwala. 8 'Enega tokabo nidi 'ediyega wada 'ita'i'isimi, be 'imi guinuwa 'ana pali geya'abo waloseloseye, ta esi maibo'ana wa'ewa. 9 Ta 'eguma watauya gesi be Keliso 'ina e'ita wapilisine, 'omi Yaubada wamiyamiya sine, ta esi 'eguma Keliso 'ina e'itao wagiyai 'i'isidi, Tamadai be wate Natunana 'emiya simiyami.

10 'Enega 'eguma yaita 'emiya 'iwawai ta 'ina e'ita dumadumana, geya'abo wabwaubwauye 'imi anuwaya nai walokagutokiye, 11 'abona nai 'ina guinuwa nina to'umalina walemeleme.

Ona 'ana 'ebe losalowa

12 Yage yauna simiyami be nuwanuwagu manudi ya'etoladiwa, ta tuwa, manuna yanuwayaina 'aene ma'etamo yada wai be 'omi ma'egwao tada 'awagwae, be 'enega tada egwausowala 'ai'aila.

13 Tasiyo tauna wate esiesinuwana Yaubada 'enega, natunao 'idi oboboma 'emuya.